كلنا كنا بنضرب كف بكف متعجبين من «الخسائر المتلتلة» للسكك الحديدية؛ حتى كشف لنا كامل الوزير وزير النقل بالدليل القاطع والبرهان الساطع السر وهو أن السكك الحديدية مال سايب بيعلم السرقة.. ولذلك بدأ بقوة فى تطهير القطاع من الحرامية والهليبة ولاعبى «التلات ورقات».
نضف ياوزير وقش.. فمفيش أكتر من المقشات فى البلد..!
قلتها وهأقولها كمان وكمان: الأخ ترامب ساكن البيت الأبيض، وشهبندر تجار أراضى العالم، عنده كل الحق فى المطالبة بعدم ملاحقة المجرمين الإسرائيليين والأمريكيين دوليا أمام القضاء؛ من ناحية لأنهم ولاد البطة البيضا والباقى ولاد البطة السودا.. ومن ناحية تانية لإن دى هى العدالة اللى بيحبها ترامب شخصيا وبياكل صوابعه وراها؛ وهى العدالة الأمريكية بطشة الملوخية..!!
أنا ماسك لسانى بالعافية ومش عايز أعلق على ماقاله د. على عبد العال رئيس مجلس النواب من أن ضغط معاليه زاد الى 200 بسبب مناقشة التعديلات الدستورية..!
سامحنى يارب..!!
إعادة انتخاب «النتن.. ياهو» رغم كل قضايا الفساد والنصب والاحتيال التى يواجهها، والتى تسد عين الشمس، يؤكد المقولة الشهيرة أن كل شعب يستحق من يحكمه.. وأن رئيس الوزراء الحرامى للإسرائيليين… رزق..!
بالمناسبة.. من نعم ربنا على الإنسانية إن إسرائيل فشلت فى الهبوط على القمر؛ لإنها لونجحت كان ترامب طلع لها قرارا فوريا بالسيادة على القمر.. زى ما عمل مع الجولان بالضبط.. صدقونى كان يعملها..!
ينقطع لسان كل اللى يقول إن أمريكا هاتنفخ «أسانج» مؤسس ويكيليكس بعد القبض عليه بطريقة لا إنسانية فى لندن؛ لإنه عرى وفضح كل ما ترتكبه من جرائم فى العالم كله باسم الحرية والديموقراطية..!!
صحيح إنهم شالوا أسانج «مرابعة» من إيديه ورجليه وهم بيقبضوا عليه.. لكن ده من باب التكريم والتبجيل؛ فالراجل شايلينه من على الأرض شيل..!!
أنا شخصيا أتوقع من لندن أن ترسل أسانج بعثة لأمريكا علشان تعمل معاه “أحلى واجب”، ويتفسح له يومين.. وأهو بالمرة يلعب عشرة طاولة مع سلومة الأقرع بتاع أمريكا..!!
هاتوحشنا يا أسانج..!!
كلمة اللاعب أحمد حسن من على منصة قرعة كأس الأمم الأفريقية كانت خايبة خالص..!
كانت شفته عايمة.. وبيتكلم بخفة شديدة وسطحية؛ وكأنه فى قرعة كأس أمم….. دوران شبرا للكورة الشراب..!

محسن حسنين